ஸ்பெக்ட்ரம் விவகாரத்தில் - மௌனம் கலைப்பாரா பிரதமர்?

ஸ்பெக்ட்ரம் விவகாரம், இன்று, ஊடகங்களிலும் பொதுமக்கள் மத்தியிலும், எவ்வளவு விரிவாக அலசி ஆராயப்பட்டாலும், இவ்விஷயத்தில், பிரதமர், அளவுக்கதிகமாக மௌனம் சாதிப்பது, மிகவும் நெருடலாக உள்ளது. தன் தலைமையில் இயங்கி வரும் அமைச்சரவையின், ஒரு முக்கியமான அமைச்சர் மீது அசாதாரணமான குற்றச்சாட்டு சுமத்தப் படுகிறது. நாடாளுமன்றமே, ஒரு கூட்டத் தொடர் முழுமைக்கும், தனது அலுவல்களைச் செய்ய முடியாத அளவுக்கு, இவ்விவகாரத்தை எதிர்க் கட்சிகள் அனைத்தும் கிளப்புகின்றன. தன்னுடைய ஆலோசனையை மீறி, ஒரு அமைச்சர் அலைக்கற்றை ஒதுக்கீட்டில் முடிவெடுத்து, அதனை நியாயப் படுத்தித் தனக்கு பதில் எழுதுகிறார். அந்தக் கடிதத்துக்குக் கூட, ஒரு மாத காலம் பதில் எழுத முடியாமல், தாமதமாக எழுதிய பதிலில் கூட ஒரு விளக்கம் கூடக் கோர முடியாமல் அவரது கை கட்டப் படுகிறது. தன் அமைச்சரவையில், யார், எந்தத் துறையின் அமைச்சராக நியமிக்கப் பட வேண்டும் என்பதை, தன்னைத் தவிர யாரெல்லாமோ அலசி ஆராய்ந்து முடிவெடுக்கிறார்கள். முன்னாள் தொலைத் தொடர்புத் துறை அமைச்சர் (அருண் ஷோரி), தனக்குக் கிடைத்த தகவலின் அடிப்படையில், ஏதோ ஒரு பெரிய தவறு நடப்பதாக உணர்ந்து, ராஜ்ய சபா வளாகத்தில் பிரதமரைச் சந்தித்து, இந்த விவகாரம் தொடர்பாகத் தங்களை எச்சரிக்க வேண்டிய நிலைக்குத் தள்ளப் பட்டுள்ளதாகவும், அதற்காகத் தங்களின் செயலாளரை என்னிடம் அனுப்புயனால், தனக்குத் தெரிந்த விஷயங்களை, ஆதாரப் பூர்வமாகப் பகிர்ந்து கொள்வதாகவும் அவரிடம் கூறியதாகத் தெரிவிக்கிறார், ஊடகம் வாயிலாக. இரண்டு ஆண்டுகளாக, இவ்வளவு தூரம் முன்னேறியுள்ள இந்தப் பூதாகாரமான விஷயத்தில், பிரதமரின் அசாத்தியமான மௌனம், அவர் மீது ஒரு பெரிய சந்தேக நிழலை உருவாக்கி இருக்கிறது. தன் மீது படிந்திருக்கின்ற அந்த நிழலை, விரைவில் மக்கள் முன், ஊடகங்கள் வாயிலாகத் தோன்றிப் பிரதமர் விவரமான விளக்கங்கள் அளிப்பதன் மூலமே அகற்ற முடியும். அந்தப் பொறுப்பும், கடமையும், அவருக்கு உள்ளது என்பதை அவரால் மறுக்க முடியாது. செய்வாரா பிரதமர்? செய்ய விடுவார்களா, அவரைக் கட்டிப் போட்டிருப்போர்?

- கலைபிரியன்